<< 沒有期待2021年比2020年變得更好，只有期待2021年嘅自己比2020年嘅我變得更好 >>
尋晚我問年過60歲嘅阿媽 :你覺得做咗咁多年人，2020年係唔係你經歷過最壞嘅一年？
冷笑咗幾聲，佢話：傻啦2020年又點算最差呢？相比起以前，佢所經歷過嘅冇飯食冇衫著，見過嘅批鬥土改下鄉坐監。2020年只不過係一個低級難受嘅局面，都未去到advanced level。
好似嗰日我睇華人移民史，見到以前啲人畀人賣豬仔去秘魯，要喺莊園入面日以繼夜工作做奴隸，甚至因為疲勞過度，糧食不足，客死異鄉。
如果對比起呢啲，2020年好似唔算得係啲乜。我明白差係唔需要比較，但有時見到大家期待2021年會比2020年好，最少冇咁衰，其實唔應該有呢個期待。唔應該期待2021年變得咁好，而係應該期待2021年嘅自己內心變得更强大。 what doesn't kill you makes you stronger
如果覺得今日好難受，你應該有心理準備，聽日會比今日難受。但只要聽日嘅你，比今日強大，你就可以克服一切更難受嘅挑戰。
情形就好似你細個做暑期作業咁，當你以為做完十個複合練習，每個複合練習都好難受嘅時候。揭到最尾竟然有一個combine一切苦難嘅綜合練習，然後做完綜合練習，再揭竟然有綜合練習二 …...
活著從來都唔易，但我已經ready ….. 嚟啦， 我準備好迎接綜合練習3 架啦！
Search